धनुषा जिल्लाको ऐतिहासिक तथा धार्मिक स्थल धनुष मन्दिरलाई ट्रस्टमा लैजाने प्रक्रिया अघि बढाउन धनुषाधाम नगरपालिकाका मेयर बालेश्वर मण्डलले निर्देशन दिएका छन्। मकर मेला समितिले आयोजना गरेको धनुष मन्दिर व्यवस्थापन सम्बन्धी विशेष भेलामा बोल्दै मेयर मण्डलले नगरपालिकाका वडा नम्बर १ देखि ५ सम्मका वडा अध्यक्षहरूलाई सो प्रक्रिया अघि बढाउन आग्रह गरेका हुन्।
समुदायबाट मन्दिरको व्यवस्थापन ट्रस्टमार्फत गर्नुपर्ने माग उठेपछि, मेयर मण्डलले आफू समुदायको इच्छाअनुसार काम गर्न प्रतिबद्ध रहेको बताए। साथै, मन्दिरका पूजारी भरत बाबाको व्यवस्थापन, मन्दिर परिसरको सुरक्षा र सरसफाइलाई समेत प्राथमिकतामा राखिने उनले स्पष्ट पारे।
धनुष मन्दिरको सुरक्षाका लागि हालै सिसीटीभी क्यामेरा तथा लाइट जडान गरिसकिएको छ भने, थप सुरक्षाका लागि नगर प्रहरी र सरसफाइ कर्मचारीको व्यवस्था गरिने भएको छ।
धनुषाधाम नगरपालिकाले बजार तथा मकर मेलाको व्यवस्थापनका लागि तीन वा पाँच वर्षका लागि ठेक्कामा लगाउने योजना अघि सारेको छ। विद्यालयलाई अनुदान दिनेसम्बन्धी योजनामा पनि नगरपालिकाले आवश्यक निर्णय लिने जनाएको छ।
धनुष मन्दिर व्यवस्थापनसम्बन्धी भेलामा नगरपालिकाका उपमेयर विद्या देवी भुजेल, वडा नं। ३ का अध्यक्ष जयनारायण यादव, वडा नं। २ का अध्यक्ष लक्ष्मी साह, वडा नं। ५ का अध्यक्ष इन्द्रकुमार महतो, माओवादी नगर अध्यक्ष विश्णी यादव, जसपा नेपालका नगर अध्यक्ष बिनोद भरखेर यादव, अभियानी प्रमोद कुमार यादव, विभिन्न राजनीतिक दलका प्रतिनिधिहरू, पूर्व जनप्रतिनिधिहरू, समाजसेवी, बुद्धिजीवी, व्यापारी, तथा सुरक्षाकर्मीहरूको उल्लेखनीय उपस्थिति रहेको थियो।
मेयर मण्डलले समुदायको इच्छाअनुसार धनुष मन्दिर व्यवस्थापनलाई व्यवस्थित गर्दै विकासका योजनाहरू अघि बढाइने प्रतिबद्धता जनाएका छन्।
